You are currently browsing the monthly archive for مايو 2007.

لا أجد حتى الوقت الكافي للرد على التعليقات , ولأن محاولة كتابة تدوينة جديدة باءت بالفشل من قبل أن ابدأ في كتابتها حتى ..

توقف تام حتى يوم ال 17 من يونيو ..

تحياتي لكل من يتابعوني ..

لعنة الله على كلية الهندسة وامتحاناتها.. 

سؤال أخير قبل الإختفاء الكبير

ماذا تفعل في بلد يظن نصف سكانها أنهم شهداء وضحايا والنصف الثاني يظنون أنفسهم عباقرة؟!

جاوب في اقل من 10 سطور ..

تدوينة سريعة لأن عندي امتحان في غضون بضعة ساعات ..

لكل من استخدم الورد بريس سواء على سيرفر شخصي او من خلال وردبريس دوت كوم أو من خلال أي خدمات تدوين غير مباشرة تستخدم الورد بريس مثل تدوين او blogsome وأعجبهم الورد بريس بإمكانياته ومرونته والدعم الفني الرائع الذي تحصل عليه من فريق العمل والذي لا يمكن أن تجده في أي مكان آخر , يمكنكم الآن التصويت ل وردبريس دوت كوم في جوائز ال webaware ..

فقط اضغط على الصورة في الأسفل ..

أعتقد انهم يستحقون الفوز وبجدارة ..

 

أنا عصبي أحياناً .. حقيقة يعرفها اللي يعرفني .. عارف أن ده غلط وبكرهه فيا وخصوصاً أني من نوع المدفع اللي بيدوس لما بيتضايق , بس الفكرة ان الناس مبتجيش غير كده .. ليه الناس مبتتعاملش باحترام وبهدوء لا زم نتعصب عليهم يعني؟

خد عندك مثلاً النهاردة .. راجع من الكلية في الشروق وسايق العربية ومكنتش نايم ومحاضرات وضغط عصبي ومش طايق نفسي الاقي تليفون بيقولولي هات غدا معاك .. طيب ماشي اوكي مفيش مشاكل , قلت اروح عند الكولونيل عشان بيخلص بسرعه , عشر دقايق وهخلص بالكتير اوي .. ادخل خير اللهم اجعله خير اقعد ساعه الا ثلث ..

بجد حاولت اني متعصبش ومسكت نفسي عشان عارف اني لو اتعصبت هيبقى الناتج مش لطيف وانا عارف ان الناس دي برضه حرام اتعصب عليهم وكده , بس قلت اشوف ايه اللي مأخرني كده .. ” يا سمير فين الفاميلي بتاعتي ؟ , في ناس جت بعدي واهي الاوردرات بتاعتها طلعت امال ايه بقى؟” , تيجي الاجابة اللذيذة ان عشان الاوردرات بتاعتهم صغيره فهما بيطلعوها الأول .. طيب وانا مالي يعني ؟ , ” وهو انت بتعاقبني عشان طالب اوردر كبير ولا ايه بالظبط ؟” وبعد كتير من ال عااا و عووو والخبط بايدي على الحته اللي عليها الكاونتر والناس بتحاول تهديني واحنا اسفين ومعرفش ايه قالولي خمس دقايق بالظبط وهيكون الأوردر جاهز وجابولي كوكاكولا انا وواحد صاحبي قاعد معايا .. وقبل ما الحق اخلص حتى الكوكا لقيت الاوردر خلص ..

طيب هو لازم الواحد يتعصب يعني ولا ايه بالظبط ؟ مينفعش في البلد دي حاجه تمشي بهدوء واحترام؟

تدبيسة من دافينشي ولا بد أن تؤدى ..

أحب شخص لقلبك في الدنيا؟إنسان مستعد تضحي بحياتك – ركز فى كلمة حياتك – عشانه؟

الإنسانة اللي بحبها واللي عارفة نفسها :)

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

مفيش حد وصل للدرجه دي رغم أني عصبي يعني .. بس ممكن نقول القيادات السياسية وخصوصاً الراجل الكبير ده اكتر واحد كرهته في حياتي بس مش لدرجة القتل

ما هو:اسم أجمل كتاب كتبه بشر قرأته ومحتفظ به حتى الان؟

“على نهر بييدرا هناك جلست فبكيت” لباولو كويلهو..

اسم كتاب – كتبه بشر برضه – انت متعلق بيه وبتقرأه كل فترة؟

مش فاكر بالظبط , لأن معدل قرايتي قل أوي من فترة بسبب الكلية والسفر والذي منه , بس ممكن نقول “التعصب و التسامح بين الإسلام والمسيحية” للشيخ محمد الغزالي رحمه الله ..

أهم جهاز منزلى أنت متعلق بيه أو بتستخدمه كتير؟

الثلاجة طبعاً , امال هاكل منين يعني :D

مكان تحس بالراحة عندما تدخله؟

أوضتي ..

شيء تحس بالراحة النفسية عندما تنظر إليه؟

القناة ومعدية نمرة 6 في إسماعيلية هنا ..

مكان تحس فيه بالحنين الى شيء لا تدرى ماهو و ذكريات جارفة الى لاشيء؟

بيت جدتي الله يرحمها في اسماعيلية , وبورفؤاد كلها ..

اجمل مدينة زرتها داخل مصر ؟

مش عشان انا عايش فيها , بس الإسماعيلية اجمل مدينة فعلاً , وده بسبب الهدوء والمسطحات الخضرا الكتير , وبعدها اسكندرية وشرم والغردقة ..

أجمل مكان طبيعي رأيته داخل مصر ؟

تحت الميا في شرم الشيخ .. لا تعليق ..

شخصية كارتونية بتحبها؟

دايسكي من كارتون جريندايزر

نوع هاتفك المحمول؟

نوكيا N73

سرعة بروسيسور جهازك؟

2.4 Ghz

حجم ذاكرة -هارد- جهازك؟

80 GB

المساحة التى تشغلها المواد الاسلامية على جهازك؟

3 GB

نفس المساحة السالف ذكرها فى قلبك -الإجابة لنفسك عشان الرياء يا اخواننا -؟

الله أعلم لأن انا نفسي مش عارف..

أهم هدف انت واضعه لحياتك الآن؟

أنجح السنة دي وربنا يسترها معايا ..ده الهدف المرحلي اما الهدف الاستراتيجي فده ليه موضوع لواحده

مواصفات فتى \فتاة الأحلام بالنسبة لك؟

أنها تكون هي .. بس تتكلم اكتر شوية وتقرب أكتر شوية ..

صف ما يأتى:شعورك لما بتسمع كلمة مصر ؟

جسمي بيقشعر , تحيا مصر يا عم

شعورك لما بتسمع كلام عن اليهود؟

مالهم يعني؟ بني ادمين .. لو قصدك الاسرائيليين فشعوري بصراحة غير صالح للنشر ..

شعورك لما بتشوف ظابط شرطة؟

بتخنق اوي ..

شعورك لما بتشوف الكناس العجوز فى الطريق؟

بتضايق اوي .. بحس أن البلد وحشة اوي ..

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

هو شايف أن الدين كده والتزامه وتمسكه بما يؤمن بيه ده شيء أحترمه , بس أنا شايف ان الدين مش كده .. والمهم أن الشاب ده ميكونش من الأخوة اللي شايفين أن الخروج على الحاكم حرام شرعاً ما لم يمنع الصلاة :(

إحساس يراودك فى إشارة مرور مغلقة بسبب مسئول كبير؟

حسرة وغل و و و و .. دي عايزه بوست لوحدها , عامة دي مبتحصلش في اسماعيلية غير لما الريس حبيب الملايين بيزورنا وده حتى نادراً يمشي بالعربية أصلاً ..

بس كده خلصت ..

أمرر التدبيسة دي لمين ؟ هممم

كتاتني

الأسطى حمدي

علياء

زيزو

منيرفا

مصطفى حصبة :D (مصطفى يحيى سابقاً)

محمد ياسر

عبسميع

ياسر بن مجدي

رزان

free domains :)

مدونة نظيفة

أنا أعدك بأني لن استخدم الفاظ خارجة تجرحك , وأعدك أني سأحاول أن تكون هذه المدونة نظيفة بقدر الإمكان , ولكني لست ضد المدونات الغير نظيفة , انا مع حرية الرأي ولو كان هذا الرأي (قلة أدب) في نظر البعض .. من حق كل فرد أن يعبر بالأسلوب الذي يريده عن نفسه , ومن حقي أن لا اقرأ ما يكتب لو كانت تضايقني الألفاظ الخارجة , ولكن ليس من حقي الحجر عليها ..

مروا بصمت

  • 49,226 ضحية

شبكة مدوناتي

تابع

Get every new post delivered to your Inbox.