الدرس انتهي

الدرس انتهي لموا الكراريس

بالدم اللي علي ورقهم سال

في قصر الأمم المتحده

مسابقه لرسوم الأطفال

ايه رأيك في البقع الحمرا

يا ضمير العالم يا عزيزي

دي لطفله مصريه وسمرا

كانت من أشطر تلاميذي

دمها راسم زهرة

راسم راية ثورة

راسم وجه مؤامرة

راسم خلق جبارة

راسم نار

راسم عار

علي الصهيونيه والاستعمار

والدنيا اللي عليهم صابره

وساكته علي فعل الأباليس

الدرس انتهي

لموا الكراريس

ايه رأي رجال الفكر الحر

في الفكره دي المنقوشه بالدم

من طفل فقير مولود في المر

لكن كان حلو ضحوك الفم

دا الطفل الفلاح

راسم شمس الصباح

راسم شجرة تفاح

في جناين الإصلاح

راسم تمساح

بألف جناح

في دنيا مليانه بالأشباح

لكنها قلبها مرتاح

وساكته علي فعل الأباليس

الدرس انتهي لموا الكراريس

, كلمات جاهين , وغناء شادية .. يا ترى نسينا؟ نسينا زي النهاردة من 37 سنة , نسينا شركاءنا الاستراتيجيين في السلام والمنطقة عملوا ايه؟ نسينا صح؟..
هي الجرايم دي بتسقط بالتقادم ؟

مش هننسى بحر البقر .. ومش هننسى ونقول دلوقتي في شالوم ..

Advertisements