علياء ربنا يكرمها حدفتلي التاج الطويييييييييل ده ..

لما نشوف ..

هل كنت طالب شاطر فى المدرسة؟

أكيد ) لدرجة محدش يتخيلها .. أنا فاكر في سنة رابعة ابتدائي عيطت عشان مطلعتش الأول على المدرسة .. طبعاً الكلام ده كله كان أيام ما كانت ماما بتذاكرلي وانا صغير ..لغاية ما كريم توفى ومعدش حد عنده الدماغ انه يعمل أي حاجه .. مستوايا انحدر في إعدادي ومع ذلك نقصت حوالي 20 درجة بس على المجموع النهائي في إعدادي .. وفي ثانوية عامة .. تانية ثانوي جيبت 94.6 % , وفي تالته ثانوي لما عرفت ان مفيش اغدادي هندسة في اسماعيلية هيفتحوه زي ما كانوا قايلين حاولت افشل نفسي واجيب مجموع تجارة انجليزي بحيث اني افضل في الاسماعيلية (ده في حال اني فشلت في اختبار الكلية الجوية ) .. الواحد كان عنده خطط كتير اوي . . القدر بيلعب بينا العاب صعبة اوي..

ايه كانت احب مادة و اكره مادة ليك فى المدرسة و الكلية؟

همم في المدرسة , مش هقول الرياضيات عشان اثبت اني ذكي وعبقري-رغم ان عمري ما نقصت فيها درجه غير في تالته ثانوي- زي كل الناس اللي خير اللهم اجعله خير كانوا بيحبوا الرياضيات (امال البلد متأخرة كده ليه مادام فيها كل الذكاء ده)
بس انا كنت بحب اوي اوي الجغرافيا والتاريخ بسبب مستر هنري ربنا يمسيه بالخير في مدرسة السلام الانجيلية .. الراجل ده علمني ازاي احب بلدي بجد .. بكل تاريخها .. وبجد كان بيحبني اوي .. ربنا يرزقك بالخير يا مستر هنري ) ..

اما اكتر مادة كنت بكرهها فهي الفرنساوي .. بسبب ميس سها مش هقول منها لله لأني اخدت حقي بعدها تالت ومتلت D

في الكلية بقى اكتر مادة حبيتها كانت ال circuits مش عشان الدكتور بس عشان المادة كانت حلوة وانا كويس فيها اصلاً لأنها بتعتمد بنسبة كبيره اوي على العقل ومش محتاجه مذاكرة كتير .. اما اكتر مادة كرهتها فهي ال MATLAB وده بسبب اني مش بحب البرمجة خالص..

كنت عايز تتطلع ايه وأنت صغير ؟

طيار حربي ورئيس جمهورية .. ولسه نفسي فعلاً في الاتنين بس للأسف انا نظري مش قوي كفاية للأولى , ولسه بدري على التانية ..

دائما ما تطالب المرأة بالحصول على حريتها فما مفهوم الحرية عند المرأة؟

اسألي واحدة مرأة وانا مالي 🙂

متى احسست بنفسك “خائن”؟

محصلش تقريباً حسبما أتذكر ..

باقي التاج اسألة انثوية مليش فيها 😀

عامة متهيألي كده كفاية عليا ..

أمرر التاج لمين؟

معتقدش في حد متمررلوش التاج ده ..

عامة هشوف كده وربنا يسهل ..

Advertisements