You are currently browsing the category archive for the ‘تدوين’ category.

محارب النور , مدونة بدأتها لترجمة مدونة باولو كويلهو warrior of light ..أحببت جداً مدونة كويلهو وارتبطت بها وكنت دائماً ما اتابعها .. بدأت الفكرة عندي في ترجمة بعض التدوينات التي اعجبتني جداً وخاصة تدوينة عن الخلود about immortality التي تحكي عن مصاص دماء يؤمن بالاشتراكية وحقوق البروليتاريا ويعاني من الملل .. وبعد ترجمتها نشرتها في أحد المنتديات الأدبية ووجدت صدى لا بأس به ومن هنا بدأت الحكاية .. وحينما وجدت أني تقريباً سأترجم معظم ما ينشر من تدوينات لكويلهو , وحينما وجدت أنه لا يوجد نسخة عربية رسمية من المدونة , قررت أن ابدأ وأقوم بها بنفسي ..

واجهتني في البداية العديد من المشاكل منها اني بدأت في استخدام الوردبريس لأول مرة عن طريق تلك المدونة وانشأتها في دقائق , وفي الطريق انضم إلى محمد ورزان وريما , وبدأ تدريجياً النمو في المدونة وتطور المستوى في الترجمة وهو شيء لاحظته عند المراجعة التي اقوم بها لكل ما ينشر قبل نشره .. ولكن كالعادة توقف الموضوع بسبب الامتحانات الملعونة , كلهم كانوا في السنة النهائية ماعداي بسبب لعنة السنة الخامسة في هندسة ..وبعد توقف عدنا مرة أخرى ..بتدوينة كويلهو رقم 139 التي تتحدث عن الشهوة ..

لم تنل المدونة الاهتمام الكافي او المتابعة الكافية او التعليقات الكافية في نظري بعد المجهود الذي يبذله الجميع فيها ولكن أنوي على أن أكمل ما بدأته ومعي فريق عمل أكثر من رائع لتكون النسخة العربية من مدونة كويلهو , لأن القاريء العربي من حقه أيضاً أن يقرأ ..

أخيراً أود أن أشكر فريق العمل معي .. رزان , محمد و ريما , شكراً لكم , سواء لدعمكم قبل مشاركتكم ولمشاركتكم .. بدونكم ما كان المدونة لتكون .. شكراً لكم ..

زوروا محارب النور

Advertisements

اضغط على الصورة لمزيد من التفاصيل ..

لمن لا يفهم أي شيء راجع هذه الوصلة

https://hedoo2.wordpress.com/2007/05/27/p18/

تاج من عمرو عز الدين حامل في عربية 128 , ربنا يكرمه ونردهوله بتاج انقح منه إن شاء الله 😀

 

الأول: هل كنت طالب شاطر فى المدرسة ؟

أكيد ) لدرجة محدش يتخيلها .. أنا فاكر في سنة رابعة ابتدائي عيطت عشان مطلعتش الأول على المدرسة .. طبعاً الكلام ده كله كان أيام ما كانت ماما بتذاكرلي وانا صغير ..لغاية ما كريم توفى ومعدش حد عنده الدماغ انه يعمل أي حاجه .. مستوايا انحدر في إعدادي ومع ذلك نقصت حوالي 20 درجة بس على المجموع النهائي في إعدادي .. وفي ثانوية عامة .. تانية ثانوي جيبت 94.6 % , وفي تالته ثانوي لما عرفت ان مفيش اغدادي هندسة في اسماعيلية هيفتحوه زي ما كانوا قايلين حاولت افشل نفسي واجيب مجموع تجارة انجليزي بحيث اني افضل في الاسماعيلية (ده في حال اني فشلت في اختبار الكلية الجوية ) .. الواحد كان عنده خطط كتير اوي . . القدر بيلعب بينا العاب صعبة اوي..

الثانى: إيه كانت أحب مادة و أكره مادة ليك فى المدرسة و الكلية ؟

همم في المدرسة , مش هقول الرياضيات عشان اثبت اني ذكي وعبقري-رغم ان عمري ما نقصت فيها درجه غير في تالته ثانوي- زي كل الناس اللي خير اللهم اجعله خير كانوا بيحبوا الرياضيات (امال البلد متأخرة كده ليه مادام فيها كل الذكاء ده)
بس انا كنت بحب اوي اوي الجغرافيا والتاريخ بسبب مستر هنري ربنا يمسيه بالخير في مدرسة السلام الانجيلية .. الراجل ده علمني ازاي احب بلدي بجد .. بكل تاريخها .. وبجد كان بيحبني اوي .. ربنا يرزقك بالخير يا مستر هنري ) ..

اما اكتر مادة كنت بكرهها فهي الفرنساوي .. بسبب ميس سها مش هقول منها لله لأني اخدت حقي بعدها تالت ومتلت D

في الكلية بقى اكتر مادة حبيتها كانت ال circuits مش عشان الدكتور بس عشان المادة كانت حلوة وانا كويس فيها اصلاً لأنها بتعتمد بنسبة كبيره اوي على العقل ومش محتاجه مذاكرة كتير .. اما اكتر مادة كرهتها فهي ال MATLAB وده بسبب اني مش بحب البرمجة خالص..

الثالث: كنت عايز تطلع إيه و إنت صغير ؟

طيار حربي ورئيس جمهورية .. ولسه نفسي فعلاً في الاتنين بس للأسف انا نظري مش قوي كفاية للأولى , والتانية الله بها عليم

الرابع: هل فكرت فى إغلاق المدونة .. و السبب ؟

لا طبعاً , حد لاقي مدونات , بكره تنزل المدونات الصيني وتضرب السوق ..

الخامس: صورتك فى المدونة.. رمزيتها ؟

ورد بريس مفيهوش صور في المدونة :-p (ده وش بيطلع لسانه على فكرة)

السادس: طبيعة كتابتك فى المدونة بشكل عام.. سياسة.. قصة.. عبث.. كلام فاضى ؟

خلطبيطة حضرتك

السابع: لماذا تدون أصلا ؟

الدكتور واصفلي التدوين عشان مقتلش حد..

الثامن: أحلى جملة قيلت لك فى وصف مدونتك ؟

مدونة لذيذة .. الجملة الشهيرة 😀

التاسع: التعليقات بالنسبة لك.. أهميتها ؟

بتحسسني إن اللي بكتبه ده ليه معنى وليه لازمه ..

العاشر: أفضل مدونة قرأتها.. يمكن اختيار عدة مدونات

ما بدا لعمرو , رغم عدم اتفاقي معه في حاجات بس بحب اتابعه وإن كنت بعلق نادراً هناك ..

الحادى عشر: حد قل أدبه فى التعليق.. إيه رد فعلك ؟

بسيب التعليقات زي ما هي مادام ليها معنى , لكن واحد داخل يشتم بس كده لله في لله همسح التعليق طبعاً

الثانى عشر: أسوأ مدونة الاجابة اجبارية يمكن اختيار عدة مدونات هما كتير اصلا ؟أسوأ مدون مهو هتجاوب هتجاوب؟أسوأ بوست؟

مدونة البتاع اللي اسمه كريم عامر

الثالث عشر: إيه اللى هيحصل لايميلك لما تموت ؟

هيقعد شوية لغاية ما يتلغي

الرابع عشر: إديت الباسوورد لحد قبل كده ؟

اه.

الخامس عشر: اسمك ؟

برعي , هيكون ايه يعني , محمد النقيب

السادس عشر: اسم الدلع المشهور وسط أصحابك ؟

كيبا , كيبو , ييييي هو جه 😀

السابع عشر: عمرك ؟

21 تميتهم في مايو اللي فات

الثامن عشر: برجك ؟

النمر , في الأبراج الصيني , وفي الأبراج العادية مش هقول عشان الإحراج ..

التاسع عشر: مجال دراستك ؟

هندسة القوى الكهربية والآلات .. اوعى وشك يعني ..

العشرون: شخصيتك نوعها إيه ؟

متقلب ..

الحادى و العشرون: السفر بالنسبة لك إيه ؟

قصة حياتي .. بحب اوي اغنية على سفر لحسن الأسمر على فكرة..

الثانى و العشرون: المود بتاعك ؟

دلوقتي؟ مخنوق..

الثالث و العشرون: وقت فراغك بتعمل فيه إيه ؟

مفيش حاجة ثابتة , انا نسيت موضوع وقت الفراغ ده من زمان ..

الرابع و العشرون: الأكلة المفضلة ؟

بيتزا وسباجيتي (ايطاليا مظبطاني بصراحة)

الخامس و العشرون: الصفات اللى خدتها من بابا ؟

بابا مخدتش منه حاجة تقريباً غير اني بسامح زيه ..

السادس و العشرون: الصفات اللى خدتها من ماما ؟

.. إني ممكن أتداس عشان اللي بيحبني من اللي بيحبني ..

السابع و العشرون: أكتر ست حاجات بتحبها ؟

..الشيخ محمد رفعت في رمضان قبل اذان المغرب ,وقفة البلكونة في الفجر , ذكرياتي من زمان وانا صغير مع اخويا , الكمبيوتر بتاعي , نكتة حلوة ,شعور أن حد بيحبك من القلب..

الثامن و العشرون: أكتر ست حاجات بتكرهها ؟

..البطء , الغباء , العناد في الغلط , النفاق, الندالة,الكذب..

التاسع و العشرون: الشغل بالنسبة لك ؟

..مجربتوش رسمياً لسه غير في التدريب الصيفي..

الثلاثون: إيه الكمبيوتر و الإنترنت بالنسبة لك ؟

..سبب مصايبي وسعادتي ..

الحادى و الثلاثون: أمررهم لمين ؟

علياء

منيرفا

إيما

زيزو

عبسميع

وأنا تهت يا آبا

تهت واتلطمت يامــا

جوايا حب

كائن خرافي

ساكن بقلبى

عيوني وحدها شايفاه

وحدها عشقاه

بتدور تحب

***

جوايا قلــب

محتاج لقلب

محتاج له قلب

عايز يحــــب

يعزف ربابة

ويدور مسافر في الحياة

وحده كده

في الدنيا زي الطيف حزين

من غير أنيــن

زي السحـــابة

***

شربني يا آبا

م الهوى

م الدنيا

م الأحلام

وسيبني

طلّق كفوفي م القيود

من غير سدود

هــجري .. لوحدي

وارمح ، بعيــــــد

لكن لفين ؟

لحد ما الأحلام تاخدني

وتلف بيا

تتوهني

جايز ألاقي ف حضنها

حلــم الصبا

***

شربني يا آبا

م الهوى

عطشان صبابا

خد بإيدي ع الطريق

أوعاك تسبني – وحدي – غريق

دا أنا تهت يا آبا

تهت واتلطمت يا مـــا

من غير صديـق

من غير حبيب

******

من مصطفى يحيى

free domains :)

مدونة نظيفة

أنا أعدك بأني لن استخدم الفاظ خارجة تجرحك , وأعدك أني سأحاول أن تكون هذه المدونة نظيفة بقدر الإمكان , ولكني لست ضد المدونات الغير نظيفة , انا مع حرية الرأي ولو كان هذا الرأي (قلة أدب) في نظر البعض .. من حق كل فرد أن يعبر بالأسلوب الذي يريده عن نفسه , ومن حقي أن لا اقرأ ما يكتب لو كانت تضايقني الألفاظ الخارجة , ولكن ليس من حقي الحجر عليها ..

التدوينات الأكثر شعبية

مروا بصمت

  • 51,458 ضحية

شبكة مدوناتي