You are currently browsing the category archive for the ‘حلوة يا بلدي !’ category.

ببساطة شديدة , على قد فهمي كمواطن مصري (مش مدعي ثقافة ولا من شلة المثقفين اللي واضح إنهم أصابوا ناس كتير بالقرف) نال قدر من التعليم – انا مهندس لو حد مش عارف – إن المتهم الحقيقي مش واحد , كذا متهم وآخر واحد فيهم الجزائريين . إزاي ؟ تعالوا نبص سوا ..

اللي حصل إن شوية جمهور منحط (حوالي 9000 تقريبًا حسبما أتذكر) ضربوا في جمهورنا (اللي بصراحة مش جمهور كورة بس ده مش موضوعنا) , الجمهور المنحط ده مشحون بسبب إعلام عايز يعمل أي دوشة , وبيساند الإعلام ده شوية جنرالات في الجيش عايزين يلهوا الشعب ده عن اللي بيحصل في بلده (آه والله زي عندنا كده لما بيشغلونا كل شوية بحاجة شكل) , طيب هناخد البلد كلها بذنب شوية مشجعين واضح إنهم أصلًا مش مظبوطين (تعبير مخفف أوي عن اللي بقصده) ؟

والله اكتر من كده شفته بعيني بيحصل في ماتشات كورة هنا في الإسماعيلية وفي بورسعيد وفي القاهرة .
طيب هو مين اللي ساعد الإعلام الجزائري انه يولع اكتر في الموضوع ؟ الجزائر دي كل اعلامها على بعضه كام قناة ؟ واحنا اعلامنا قد ايه؟ لما واحد زي مدحت شلبي يجيب فيديو لمشجعين بيحرقوا علم مصر وهو عارف انه متصور من سنة بحالها يبقى ايه هدفه ؟ لما الإعلام الجزائري لقى إن بقى ليه صدى هنا ده مش يساعده ؟

طيب بلاش دي , تعالوا نبص بصاية كده , بتتكلموا عن الكرامة والهوان والكلام ده ؟ طيب هو الكرامة إن العساكر بتاعتنا تتقتل على الحدود من اليهود؟ الكرامة إن الغاز بتاعنا (الاحتياطي الستراتيجي الضخم بتاعنا) يتباع لاسرائيل باسعار مخفضة في الوقت اللي احنا مش لاقيينه عشان نشغل بيه محطات الكهربا اللي بنولد بيها الكهرباء اللي عندنا عجز فيها بالمناسبة بيزيد كل سنة ؟ هي الكرامة إن أصغر ضابط شرطة لو مش عاجبه شكلك وملكش واسطة ممكن يمسح بيك الأرض ويدوخك السبع دوخات ؟ ولا هي الكرامة إن أرضك لسه محتلة لغاية دلوقتي من اسرائيل بس احنا عاملين نفسنا مش واخدين بالنا ؟ (آه متصدقوش اللي يقلك إيلات مش مصرية , إيلات قرية أم الرشراش المصرية) .

الكرامة هي إننا نسحب السفير عشان تصرفات مشجعين كورة منحطين وفي نفس الوقت حتى منتخذش أي اجراء ولو صوري بعد ما العساكر يقتلوها اليهود و لا لما بنت بتلعب قصاد بيتها في رفح المصرية (واخد بالك) تضرب برصاص قناص اسرائيلي ولا لما الطيارات الاسرائيلية تروح تاخدلها لفتين فوق رفح (المصرية برضه والله والفيديوهات مالية اليوتيوب) ؟

معلش أنا زي ما قلتلكم ثقافتي وفكري على قدي فياريت حد يفهمني برضه لو انا بتكلم غلط , استحملوني معلش .
الكرامة هي إن دولة بينا وبينها دين دم ودين لغة ودين ديانة ودين مستقبل وماضي واحد نمسك فيها وتبقى العدو الوحيد والأوحد ؟
طيب حد هييجي يتكلم عن التصرفات الجزائرية والوزير اللي اثنى على تصرفات المشجعين وكلام الرئيس بوتفليقة والذي منه , طيب معلش هو انا ليه الوحيد اللي شايف انهم عايزين يشغلوا الشعب في حاجات تانية عشان يتشغل عن الفساد اللي في بلده ؟

طيب هنفترض انهم حلوين ومش بيشغلوا الشعب ولا حاجة وانهم بيدوسوا على مصر لمجرد انهم فاضيين أو بيسلوا وقتهم , طيب مين اللي وصل مصر إنها بقت كده ؟ أي حد معدي ومتضايق ياخدله قلمين ؟
طيب ازاي الشعب الجزائري اللي لما مطرب مصري درجة تاسعة يروح هناك يشيلوه فوق راسهم ويهللوله وأي فنان مصري بيروح هناك نفس الوضع , والمصريين بيروحوا هناك وبيتجوزوا هناك وعادي والله , ازاي يعمل كده فينا ويبقى سهل عليه كده (بافتراض ان كل الشعب كده وده افتراض غلط اصلًا) .

مش شايفين الوضع الحالي ؟ طيب اقلكم كام حاجة كده عرفتها , تعرفوا ان في سد افتتح جديد على النيل في اثيوبيا بدون رأي مصر وإن ده أكيد هيأثر على حصتنا من مياه النيل وده هيبان السنة الجاية ؟ طيب تعرفوا إن الدول اللي على نهر النيل لو استكملت مشروعاتها المائية اللي هتتبني بتمويل صيني و إسرائيلي مياه نهر النيل مش هتوصل لأبعد من أسيوط في خلال كذا سنة ؟ طيب تعرفوا إننا احتمال كبير ندخل على مجاعة ؟ طيب تعرفوا إننا عندنا أزمة طاقة رهيبة وإن احتمال كمان كام سنة لو مفيش حد لحقنا بدعم خارجي عشان نبني محطات كهربا نلجأ لقطع التيار الكهربي عن مناطق معينة يوميًا لساعات معينة كل يوم ؟ طيب وحلايب وشلاتين اللي بقت دائرة انتخابية سودانية ؟ مش هتكلم عن الغاز والبطالة والفساد لأن الكلام عنهم بقى ممل ..

مين المسؤول عن كل ده ؟
طيب مش من مصلحة المسؤول إنه يشغل الناس في حاجة تانية شوية (حتى بصوا مين طالع في الإعلام وبيقول ايه) ؟ معلش أنا من أنصار نظرية المؤامرة هنا شوية , زي ما قلت فوق تفكيري على قدي وبحاول اظهر مثقف شوية .
عرفتوا ليه بقول الجزائر آخر متهم في القائمة ؟

على فكرة عشان أبقى واضح بس , أنا مش بقول نسيب ونعدي اللي الجزائر عملته , بس بقول الصح مش بيتجزأ , لو ناخد موقف ناخد من كله ونجيب حقنا كله ونوجه غضبنا في الاتجاه الصح , مش في اتجاه الجزائر بس ..

ربما هي نتاج تربيتنا , ربما هي محفورة على جدران الجينات التي نتوراثها عن أباءنا .. حالة الانتظار الملازمة لنا دومًا , ننتظر القائد الشجاع الذي سيوحد الأمة ويذهب ليحرر فلسطين , ننتظر المهدي المنتظر الذي سيملأ الأرض عدلًا بعدما امتلأت ظلمًا , والرئيس الذي سيأتي ليختفي الظلم والفساد وينتحر بمجيئه كل الفاسدين وتنطلق الطائرات الخاصة من مطار القاهرة متوجهة إلى سويسرا حاملة على متنها كل اللصوص بما نهبوه أو بدونه , وفي غضون سنوات قليلة سيذهب كل فرد منا إلى مغسلة طائرات الهليكوبتر التي يتعامل معها ليتسلم طائرته ويقلع بها ليمضي أجازة نهاية الإسبوع في الفيلا الخاصة به على أحد السواحل .
للأسف من البداية ألاحظ أن الكل بدأ في تحميل السيد البرادعي فوق طاقته قبل حتى أن يعلن ترشيحه , الكل ينتظر منه كل شيء , ونتناسى أن الرجل في النهاية مجرد رجل .. لا أريد إحباط أي شخص ولكن يجب أن يتم توعية الناس بأن الدكتور محمد لن يكون أكثر من مجرد فترة انتقالية للديمقراطية , لا يجب أن ننتظر منه أن يحل كل شيء لأن أصل المشكلة فينا نحن , الفساد تغلغل من أعلى المناصب إلى أقلها , الموظف الذي يرتشي ليسهل مرور شحنة قمح فاسدة لم يضربه أحد على يده ليفعل ذلك وبالتأكيد لو استطاع فعل ذلك ورئيسه المباشر هو أحد الأنبياء لن يخجل من فعلها مادام لن يكشفه أحد .
يجب علينا كمساندين لدكتور محمد البرادعي وكمثقفين أن نوضح أهداف المرحلة القادمة , أجهزة رقابية قوية للتصدي للفساد المنتشر , قضاء مستقل ونزيه , ديمقراطية حرة , دستور لا يخجل المرء من وصفه بدستور بلده ومجالس نيابية تأتي بانتخابات حرة بإشراف قضائي ونزع فتيل القنبلة الطائفية التي تنتظر الانفجار .. البقية في مرحلة تالية , لا يجب أن ننتظر كل شيء من الرجل ..
وللأسف يجب علينا أيضًا أن نُعد الشعب وكل من سيلتف حول دكتور محمد للخسارة المتوقعة , الحزب الوطني وشلة المنتفعين لن تخسر بسهولة , رقاب كثيرة جدًا ستطير و أموال كثيرة يستنزفونها من شرايين الشعب يوميًا ستضيع عليهم .. وللأسف الحزب الوطني سيحارب بقذارة -كعادته – و ستتألق فرق الكاراتيه والشرطة كالمعتاد , لهذا يجب أن نستعد للخسارة مثل استعدادنا للمكسب , كي لا تكون الخسارة ضربة قاضية لأي أحلام بالديمقراطية أو الحرية أو العدل لدينا ..
وفي النهاية فليولي الله الأصلح وليعيننا على شرور أنفسنا ..

وخسر المنتخب , وتحول كل اللي كانوا بيهللوا لعبقرية شحاتة (اللي انا عمري ما شفتها غير في ماتشين) لشتامين , وفجأة بقى المنتخب بيجيب عاهرات في الفندق و بقوا مش قادرين يلعبوا بسبب كده (ودي أكبر نكتة اتقالت في الموضوع كله !)

بعيداً عن إن منتخب البرازيل اتسرق برضه (هما كمان جابوا عاهرات يا عمرو باشا أديب ؟ , امال كسبوا ليه؟) وبعيداً عن إن الغلطات التكتيكية واضحة جداً وأي حد من مدربين القهاوي اللي منتشرين في مصر هيقدر يقلك ايه الغلطات اللي عملها شحاتة وهيبقوا عندهم حق , أنا مش متضايق إن الماتش خلص بخسارة , ويارب مندخلش كاس العالم , يمكن الشعب يبص حواليه شوية ويشوف البلد اللي بتتنهب كل يوم اكتر ..

اغضبوا ..

في الخامسة فجراً , يعاديني النوم بسبب الفضول المسيطر علي , من سيفوز بالانتخابات الأمريكية ؟ من الجميل في مصر أنك ستجد من يعرفون عن الانتخابات الأمريكية أكثر ممكن يعرفون أسم وزير التنمية المحلية (هو اللواء عبد السلام المحجوب بالمناسبة) ولأن لدي عمل في الصباح الباكر أشعر أن يوم الغد لن يكون سعيداً بأي حال من الأحوال ..

الملل يسيطر على الموقف في انتظار النتيجة , ملل لا يستطيع تبديده لعب إيكاريام على حسابين في سيرفرين مختلفين في نفس الوقت , ولا كل الرسائل المتبادلة على الجايكو , ولا حتى مشاهدة الحلقة الأخيرة من الموسم الأول ل Desperate housewives والذي أتابعه مؤخراً .. وكل هذا في نفس الوقت بالمناسبة ..

بصراحة لا تهمني نتائج الانتخابات الأمريكية إلا لإرواء فضولي لا أكثر , فالنتيجة في واحدة في النهاية , أنه أحد مواقف الخسارة الخسارة على حد التعبير الأمريكي a lose lose situation والتي يبرع فيها العرب بصفة خاصة , فماكين (ومن وراءه أغلب الجمهوريين) يساندون الكيان الصهيوني , وأوباما أعلنها صريحة (لا فض فوه) بأن القدس عاصمة أبدية لإسرائيل ! ! ولا عزاء للعرب العباقرة ..

6 % , هو الرقم الذي تمثله الأموال السعودية في الاقتصاد الأمريكي , دولة عربية واحدة أموالها 6 % من الاقتصاد الأمريكي , فماذا عن دول مثل قطر والكويت ؟! ومع ذلك لا يستطيع العرب أن يكونوا مؤثرين أو حتى أن يصنعوا لأنفسهم احترام يجعل شخصية حقيرة مثل أوباما (الذي يتغنى في كل مناسبة بأنه ليس مسلم , لأن الإسلام صار تهمة رائعة) لا يعلن ولا يصرح بموقف القدس وكأن العرب غير موجودين فعلًا ..هناك تعليق مناسب جداً للحالة العربية (وإن كان التعليق يقصد به موضوع آخر ) ذكره دكتور أحمد خالد توفيق في إحدى مقالاته “ـ”عندما يذهب مهندس الكمبيوتر اليهودي (ديفيد كاوفمان) إلى نيويورك ويصنع لوبي، فهو يصنع لوبي ذكيًا يسيطر على مصائر العالم، بينما يذهب هذا الأخ إلى نيويورك ويحاول أن يصنع لوبي فيأتي شديد الغباء .. النتيجة هي أن الأمريكان يفهمون جيدًا تفاهة ما يقول، لكنهم يحسنون استغلاله “”

حالياً أوباما متقدم على ماكين ويبقى له 63 صوت ليفوز بالانتخابات الأمريكية , مازالت لدي هواجس مما حدث في الانتخابات الماضية بين كيري وبوش حينما أعلن الكل فوز كيري وبعدها أعلنت شبكة فوكس فوز بوش ليتراجع الكل ولتحدث أشياء غريبة لا استطيع تفسيرها حتى الآن .. ولكن على الأقل لا يوجد رالف نادر ليفتت أصوات الديمقراطيين هذه المرة لأن حمى أوباما مجتاحة العالم كله ..

في انتظار المزيد

..

تحدييث

أوباما الرئيس الأمريكي الأسود الأول والرئيس الأمريكي ال 44

وبالمناسبة دي عملت poll ياريت اشوف رأيكم

free domains :)

مدونة نظيفة

أنا أعدك بأني لن استخدم الفاظ خارجة تجرحك , وأعدك أني سأحاول أن تكون هذه المدونة نظيفة بقدر الإمكان , ولكني لست ضد المدونات الغير نظيفة , انا مع حرية الرأي ولو كان هذا الرأي (قلة أدب) في نظر البعض .. من حق كل فرد أن يعبر بالأسلوب الذي يريده عن نفسه , ومن حقي أن لا اقرأ ما يكتب لو كانت تضايقني الألفاظ الخارجة , ولكن ليس من حقي الحجر عليها ..

التدوينات الأكثر شعبية

مروا بصمت

  • 51,320 ضحية

شبكة مدوناتي